आठवण

मी नसेल जेव्हा ,
आठवेन ना रे तुला मी

कपाटातल्या साडीच्या घडीत
नी बांगड्यांच्या किनकिनाटात,
स्वयंपाक घरातून येणाऱ्या
त्या चहाच्या सुगंधात

मी नसेल जेव्हा ,
आठवेन ना रे तुला मी

अंगणात उभ्या असलेल्या
तुळशीवृंदावनात,
नी सांजवेळी लावलेल्या
देवापुढच्या निरांजनात

मी नसेल जेव्हा ,
आठवेन ना रे तुला मी

अंगणात रेखाटलेल्या
ठिपक्यांच्या रांगोळीत,
नी दारावर लावलेल्या
तोरणांच्या विणीत

मी नसेल जेव्हा ,
आठवेन ना रे तुला मी

हातावर काढलेल्या
रेखीव मेहंदीत
नी केसांमध्ये माळलेल्या
मोगऱ्याच्या वेणीत

मी नसेल जेव्हा ,
आठवेन ना रे तुला मी

प्रसन्न सकाळी
चहाच्या वेळी
नी रात्री उशीवर डोकं ठेवून
झोपेच्या आधीन होण्याआधी

मी नसेल जेव्हा ,
खरेच नक्की आठव मला तू

दुखाःच्या त्या वेळी
जेव्हा सोबतीला नसेल कोणी,
नी सुखाच्या त्या क्षणी
जेव्हा चेहऱ्यावर असेल हसू नी डोळ्यात असेल पाणी